Текст песни Reine Natur - Hannes Wader

Reine Natur

Dar havert mal wedder en Tanker up Sand
Rundrum deckt dat Rohöl de See
Un jümmer mehr Smeer flütt to Lee ut de Wand
Bruun-swart, as de Ogen von’tReh
Vör't Schipp kümmt en Stockentenwaart nich mehr flott
In Smeer swümmt de Seevagel slecht
He paddelt sich neger un neger an Gott
He hett de letzt Ölung ja weg
Hebbn wi nich lehrt
Siet dat wi borrn:
Keen dar good smeert
Ward ok good fahrn!
De Segen von baven is blanke Chemie
Un kummt ut en Hubschruuvmaschin
As letztet Geschenk von uns düütsch Industrie
Kann Regen recht segensriek sien
De Teppich swümmt breed up de Doggerbank to
Ward breder up’t Wellengewöhl
De Wind geiht to Roh, un de Fischers sünd froh:
Se fangen Sardinen in Öl!
Hebbn wi nich lehrt
Siet dat wi borrn:
Keen dar good smeert
Ward ok good fahrn!
En Stöörm drifft de Smeer paar Daag later werr trüüch
Un spöölt se verdeelt up den Strand
De Sommergäst smeern sik de Smeer up den Rüüg
Denn Öl hölpt bi Sünnschien vör'n Brand
De Kurbaddirektor hett Aktien up Öl
Un as he den Ölteppich süht
Befallt em miteens so en wohlig Geföhl
«All mien!» röppt he, rein ut de Tüüt
Hebbn wi nich lehrt
Siet dat wi borrn:
Keen dar good smeert
Ward ok good fahrn!
Paar Forschers sünd wiß, dat de Nordsee noch kippt
Wieldat de Balanc' nich mehr stimmt
Se spinnen, tomal jede Kindskopp begrippt
Dat Öl jümmer bavenup swümmt
Woto dat Palavern von ölige Pest
Un Angrip up Water un Flur?
Keen hüüt op sich höllt, hett Smeer an de West
Uns Rohöl is reine Natur!
Hebbn wi nich lehrt
Siet dat wi borrn:
Keen dar good smeert
Ward ok good fahrn!